06-yanvar, 2023

Uzaytirilgan qishki taʼtil kunlari maktablarda oʻquvchilar ishtirokida toʻgaraklar tashkil etilmaydi

Maktabgacha va maktab taʼlimi vazirligi qishki taʼtil davrida umumtaʼlim maktablarida oʻquvchilar uchun toʻgaraklar tashkil etish yuzasidan topshiriqlar berilmaganligini maʼlum qiladi. Vazirlik tasarrufidagi respublika tashkilotlari — Bolalar kutubxonasi, «Barkamol avlod» bolalar maktabi tomonidan barcha loyihalar onlayn tarzda tashkil etilmoqda. Hukumatining tegishli yigʻilish bayonida belgilangan vazifalardan kelib chiqqan holda, qishki taʼtil davomida oʻquvchi-yoshlarning boʻsh vaqtlarini mazmunli oʻtkazish maqsadida kitob mutolaasini oshirishga qaratilgan onlayn intellektual viktorinalar, radio eshittirishlar hamda telekoʻrsatuvlar namoyish etilishi koʻzda tutilgan. Shu oʻrinda vazirlik hududiy boʻlinmalari hamda vazirlik tarkibidagi barcha taʼlim muassasalari rahbarlaridan qishki taʼtil kunlari oʻquvchilar ishtirokida turli toʻgaraklar tashkil etilmasligini shaxsiy nazoratga olishlari soʻraladi.