04-yanvar, 2023

Samarqandda 2,3 mlrd soʻmlik elektr energiyasidan noqonuniy foydalangan tadbirkor aniqlandi

Samarqand viloyatida tadbirkor 2,3 mlrd soʻmlik elektr energiyasidan noqonuniy foydalanib kelayotgani aniqlandi. Bu haqda Energetika vazirligi xabar berdi. Vazirligi ishchi guruhi tomonidan oʻtkazilgan nazorat tadbirida Samarqand viloyatining Ishtixon tumanida faoliyat yuritib kelayotgan «MAROQAND SIFAT TEKSTIL» MChJga qarashli tekstil mahsulotlarini ishlab chiqaruvchi sexda foydalanilgan elektr energiyasi sunʼiy ravishda pasaytirilgan tarif boʻyicha hisob-kitob kilib kelinayotganligi aniqlandi. Xususan, isteʼmolchi tomonidan foydalanilgan elektr energiyasi miqdorini hisobotlarda sunʼiy ravishda buzib (pasaytirib) koʻrsatilganligi natijada tizimga 2,3 mlrd soʻm zarar yetkazilganligi maʼlum boʻldi. Ushbu hajmdagi elektr energiyasi oʻrtacha 26 mingta xonadonning bir oylik isteʼmolini tashkil qiladi. Qoidabuzar isteʼmolchiga nisbatan belgilangan tartibda choralar koʻrildi.