03-yanvar, 2023

Qashqadaryoda terilmagan paxta borligi maʼlum boʻldi

Ijtimoiy tarmoqlarda Qashqadaryo viloyatining Muborak tumanida salkam 20 gektar maydonda paxta terilmay qolib ketgani aytilgan video tarqaldi. Holat yuzasidan tuman hokimligi rasmiy munosabat bildirdi. Maʼlum qilinishicha, videoda koʻrsatilgan paxta maydoni tumanning “Amir Temur” hududida joylashgan “EMG Inter Investment” xorijiy korxonasiga tegishli boʻlgan dala hisoblanadi. Xorijiy korxona 2022 yil 30 dekabr kuniga qadar ham dalalarda paxta terimini amalga oshirgan. Bayram kunlari munosabati bilan terimni tashkil etish imkoniyati boʻlmagan.

“Xorijiy korxona paxta yetishtirishda oʻz ilmiy qarashlariga asoslanadi. 4 yanvar kunidan boshlab terim davom ettirilishini korxona ish yurituvchisi maʼlum qildi”, — deyiladi xabarda.