31-dekabr, 2022

DXX terrorizmni moliyalashtirmoqchi boʻlgan shaxslarni qoʻlga oldi

Qoʻqonlik K.Hasanov 2019 yilda Moskvaga ishlash uchun borib, tarmoqlar orqali Suriyadagi «Tavhid va jihod katibasi» terroristik tashkiloti aʼzolari taʼsiriga tushib qolib, ularga yordam berish uchun «moliyaviy jihod» qilishga ahd qiladi. Bu haqda OʻzA xabar berdi. Maʼlum qilinishicha, Qoʻqonda yashovchi tanishi S.Zokirovni ham Suriyadagi birodarlarga moddiy yordam berishga undagan. U Oʻzbekistonda yashovchi shaxslarni «moliyaviy jihod»ga chorlashi va ular bergan pullarni Suriyadagi terrorchilarga yuborishi kerak boʻlgan. Topshiriqga koʻra, S.Zokirov «Telegram» orqali Suriyaning Idlib shahrida yashovchi shaxs bilan bogʻlanib, unga 50 ming AQSh dollari yuborishni rejalashtirgan. DXX tomonidan oʻtkazilgan tezkor tadbirda S.Zokirov bu pul mablagʻini yubormoqchi boʻlgan vaqtida jinoyat ustida qoʻlga olindi. K.Hasanov xorijda ushlanib, Oʻzbekistonga olib kelindi. K.Hasanov 8 yil, S.Zokirov esa 5 yil muddatga ozodlikdan mahrum etildi.