30-dekabr, 2022

Qalin tuman Toshkent va Andijon aeroportlari faoliyatini chekladi

Noqulay ob-havo sharoiti Toshkent va Andijon xalqaro aeroportlari ishining cheklanishiga sabab boʻldi. Bu haqda "UZBEKISTAN AIRPORTS" xabar bermoqda. Xususan, Toshkent aeroportida quyuq tuman sababli koʻrinishning yomonlashishi (250 m) "Uzbekistan Airways" aviakompaniyasining HY9614 (Moskva — Toshkent) (Moskva — Toshkent) reysi Samarqanddagi muqobil aerodromga yoʻnaltirilishiga sabab boʻlgan. HY336 (Jidda — Toshkent) reysi esa Navoiy xalqaro aroportiga yoʻnaltirilgan. Ob-havo yaxshilangach, bort yoʻlovchilar bilan poytaxt aeroportiga uchib kelgan. Andijon aeroporti ham noqulay ob-havo sharoiti tufayli vaqtincha yopilgan. "Uzbekistan Airways" aviakompaniyasining HY091 (Toshkent — Andijon) va HY049 (Andijon — Samarqand) reyslari Fargʻona aeroportidan oʻzgartirilgan jadvalga muvofiq amalga oshiriladi. "Andijon" aeroporti rahbariyati tomonidan yoʻlovchilar uchun Fargʻona aeroportiga transport tashkil qilindi. Parvozlar jadvalidagi oʻzgarishlar toʻgʻrisidagi batafsil maʼlumotlarni aviatashuvchilardan olishingiz mumkin.

tuman