29-dekabr, 2022

Mutaxassis: “Paqildoq”lar bolalarni koʻrish qobiliyatidan butunlay mahrum qilishi mumkin

Yangi yil bayrami yaqinlashgani sari "paqildoq" ommalashib ketmoqda. Bu esa insonlar uchun xavflidir. Inson tabiatan oʻziga ham, yaqinlariga ham yomonlikni ravo koʻrmaydi. Ayniqsa, farzandlarini turli falokatlardan uzoq tutadi. Ammo Yangi yil arafasida avj olayotgan “paqildoq”lar mavsumida buning aksi kuzatilmoqda. Otabek Ikromov, Respublika koʻz kasalliklari klinik shifoxonasi bosh shifokori: "Har yili Yangi yil arafasida va bayramdan keyingi kunlarda “paqildoq” va salyutlardan olingan jarohatlar tufayli birgina bizning shifoxonamizga yuzga yaqin ogʻir ahvoldagi bemorlar murojaat qiladi. Yuz, qoʻl sohalarida ogʻir kuyish, koʻzlar shikastlanishi va koʻrish faoliyati qisman yoki butunlay buzilishi kuzatiladigan bunday bolalar, afsuski, tegishli muolajalardan keyin ham qator asoratlardan aziyat chekmoqda. Hatto bemorlardan bir qismi lahzalik zavq uchun umrbod nogironlikka mahkum boʻlyapti. Koʻzning pirotexnika vositalari taʼsirida kuyishi bir necha darajaga boʻlinadi: I daraja(yengil kuyish)da koʻz terisi va shilliq qavati qizarishi, shishishi, eroziyalangan yuzalar shox pardada paydo boʻlishi kuzatiladi. Bu alomatlar koʻrish qobiliyatining pasayishiga olib keladi. II daraja(oʻrtacha kuyish)da koʻz shox pardasi va konʼyunktivasida pufakchalar hamda shox parda yuzasida xiralashish paydo boʻladi . III daraja(ogʻir kuyish)da shox pardaning chuqur xiralashishi, qovoqlar nekrozi yuz beradi. IV daraja(oʻta ogʻir kuyish) barcha koʻz toʻqimalarining chuqur nekrozi bilan kechadi.