24-dekabr, 2022

Namanganda bank xodimi mijozlarini chuv tushirdi

Namanganda bank xodimi oʻz mavqeidan foydalangan holda mijozlarining plastik kartochkalaridan 86 million soʻmdan ortiq pullarni oʻzlashtirgani aniqlandi. Bu haqda Kiberxavfsizlik xizmati xabar berdi. Qayd etilishicha, Namangan shahrida yashovchi bir guruh fuqarolar ariza bilan murojaat qilib, ularning bank kartasidan jami 86 million soʻmdan ortiq pullari nomaʼlum shaxs tomonidan yechib olinganligini bildirib, unga nisbatan qonuniy chora koʻrishlikni soʻrashgan. Olib borilgan tezkor-qidiruv tadbirlari natijasida, pullarni oʻzlashtirgan shaxslar Namangan viloyati Namangan shahrida yashovchi, 2000 y.t., bank xodimi U.A. va uning ish oʻrganuvchisi (stajyor) O.A. birgalikda amalga oshirganliklari aniqlangan. Jinoyatchilar xizmat mavqeidan foydalangan holda mijozlar tomonidan ishonib topshirilgan bank kartalarini yangilab berish vaqtida bank kartalaridagi pullarni oʻzlashtirganliklari maʼlum boʻldi. U.A. va O.A.ga nisbatan OʻzR. JKning 169-moddasi 3-qismi bilan jinoyat ishi qoʻzgʻatilib, tergov harakatlari olib borilmoqda.