Toshkentda oʻqiyotgan andijonlik talabalar Yangi yil bayramida uylariga bepul avtotransportda yetkazib qoʻyiladi
Andijon viloyati Transport boshqarmasi tashabbusi bilan Toshkent shahrida tahsil olayotgan bir guruh talaba yoshlar Andijonga bepul olib kelinadi. Bu haqda OʻzA xabar berdi.
– Yangi yil bayrami oldidan Toshkent – Andijon poyezdiga bilet topish ancha qiyin boʻladi, avtomashinada qaytish uchun esa bayram arafasida yoʻlkira birmuncha qimmat boʻlib ketadi, – deydi Andijon Transport boshqarmasi boshligʻi Oʻtkirbek Mashrapov. – Bu ayniqsa, talabalarni qiyin ahvolga solib qoʻyadi. Ana shundan kelib chiqib, talablarga qulaylik yaratish, ularga koʻmaklashish maqsadida ushbu xayrli ishga qoʻl urdik. Boshqarma boshligʻining taʼkidlashicha, Toshkent shahrida tahsil olayotgan, yangi yil bayrami va qishki taʼtilni oʻtkazish uchun uylariga keladigan andijonlik talabalarni olib kelish maqsadida 25 ta avtotransport vositasi ajratiladi. Bundan tashqari, imkon qadar koʻproq talabalarni olib kelish uchun yoʻlovchi tashish faoliyati bilan shugʻullanuvchi avtomobil egalarini ushbu xayrli ishga qoʻshish taklifi bildirildi. Avtomashinalar 27 dekabr seshanba kuni poytaxtimizdagi “Oʻzbekiston” mehmonxonasi oldidan soat 12.00 da Andijonga joʻnaydi. Toshkent shahrida tahsil olayotgan andijonlik talabalar ushbu imkoniyatdan foydalanishlari mumkin.