22-dekabr, 2022

«Dok-1 Maks» tabletka va sirop dori vositalarining savdosi 22 dekabrdan vaqtincha toʻxtatildi

Ijtimoiy tarmoqlarda Samarqandda «Dok-1 Maks» tabletka va sirop dori vositalarini qabul qilgan bolalarda turli nojoʻya taʼsirlar kuzatilgani haqida xabarlar tarqaldi. Holat yuzasidan Sogʻliqni saqlash vazirligi matbuot xizmati xabar bermoqda. Vazirlik xabariga koʻra, farmatsevtika tarmogʻini rivojlantirish agentligi ushbu vaziyatni darhol nazoratga oldi. Bemorlar ahvolini oʻrganish va holat sabablarini aniqlash maqsadida agentlik hamda Dori vositalari, tibbiy buyumlar va tibbiy texnika ekspertizasi va standartlashtirish Davlat markazining malakali mutaxassislari tomonidan tezkor mutaxassislar guruhi tuzilgan. Maʼlum boʻlishicha, Samarqanddagi dorixonalardan xarid qilingan Hindistoning Marion Biotech Pvt. Ltd kompaniyasiga tegishli «Dok-1 Maks» tabletka va limon va asal taʼmli sirop dori vositalari oʻrnatilgan tartibda ekspertizadan oʻtkazilmoqda. Laboratoriya tahlillari yakunlangach, uning natijalari haqida eʼlon qilinadi. Ushbu dori vositalarining yurtimizdagi savdosi 2022 yil 22 dekabrdan vaqtincha toʻxtatildi va bu haqda “Quramax Medical” MChJ tomonidan realizatsiya qilingan tashkilotlarga xabar yuborildi, deyiladi vazirlik xabarida.