21-dekabr, 2022

«Yuventus» yevrokuboklardan chetlatilishi mumkin

Yevropa futbol assotsiatsiyalari ittifoqi (UYeFA) «Yuventus»ni yevrokuboklardagi ishtirokidan chetlashtirishi mumkin. Bu haqda La Gazetta dello Sport xabar berdi. Manbaga koʻra, moliyaviy qoidabuzarliklar fakti tasdiqlansa, «Yuventus»ga nisbatan xalqaro turnirlardan chetlashtirish koʻrinishidagi sanksiya qoʻllaniladi. Ayni damda klub ustidan tergov ishlari olib borilmoqda. Eslatib oʻtamiz, avvalroq OAV koronavirus pandemiyasi davrida «Yuventus» oʻz futbolchilariga yashirincha maosh toʻlagani haqida xabar bergan edi, garchi klub oʻyinchilar puldan vaqtinchalik voz kechganini ochiq eʼlon qilgan boʻlsada. «Keksa sinora» 17 nafar futbolchiga 60 million yevroga yaqin maosh toʻlagan. Ommada futbolchilar maoshdan bosh tortgani haqida eʼlon qilinganiga qaramay, «Yuve» rahbariyati oʻyinchilar bilan yashirin shartnomalar tuzib, ularga katta mablagʻ toʻlashgan.