21-dekabr, 2022

Qashqadaryoda 28 yoshli ayolning jasadi hammomdan topildi. Qotil ham maʼlum boʻldi

Qashqadaryo viloyati Kasbi tumani "Tinchlik" mahallasidagi uyda ijarada yashab kelgan ayol shu yilning 16 dekabr kuni vafot etdi. Maʼlum qilinishicha, 1994 yilda tugʻilgani taxmin qilinayotgan ayol F.D.ning jasadi hammomdan topilgan. Ayol "Tinchlik" mahallasidan "Qamashi" mahallasiga turmushga chiqqan. Oilaviy kelishmovchilik tufayli yana oʻzi yashagan "Tinchlik" mahallasiga qaytib, 3 nafar bolasi bilan ijarada yashab kelgan. Bosh Prokuratura matbuot xizmati holat yuzasidan qoʻshimcha maʼlumot berdi. Mazkur holat yuzasidan tergovga qadar tekshiruv harakatlari olib borilgan. Tekshirish davomida ayolni sobiq turmush oʻrtogʻi qasddan oʻldirganligi aniqlangan. Ushbu holat boʻyicha 17 dekabr kuni Jinoyat kodeksining 97-moddasi 1-qismi (Qasddan odam oʻldirish) bilan jinoyat ishi qoʻzgʻatilgan va gumonlanuvchi protsessual tartibda ushlangan. Tergov harakatlari olib borilmoqda.