19-dekabr, 2022

Qozogʻiston Prezidenti 21-22 dekabr kunlari davlat tashrifi bilan Oʻzbekistonda boʻladi

Prezident Shavkat Mirziyoyevning taklifiga binoan, Qozogʻiston Prezidenti Qasim-Jomart Toqayev joriy yil 21-22 dekabr kunlari davlat tashrifi bilan mamlakatimizda boʻladi. Davlatimiz rahbari matbuot xizmati maʼlumotiga koʻra, tashrif dasturiga muvofiq, oliy darajadagi muzokaralarda ikki tomonlama va mintaqaviy ahamiyatga molik dolzarb masalalar muhokama qilinadi. Sammit kun tartibidan Oʻzbekiston-Qozogʻiston strategik sheriklik va ittifoqchilik munosabatlarini yanada chuqurlashtirish, oʻzaro savdo hajmini oshirish, sanoat kooperatsiyasi boʻyicha oʻzaro manfaatli qoʻshma loyihalarni ilgari surish, qishloq xoʻjaligi, transport va logistika sohalaridagi hamkorlikni kengaytirish, faol hududlararo va madaniy-gumanitar almashuvlarni davom ettirish kabi asosiy masalalar oʻrin olgan. Davlat rahbarlari bir qator yirik investitsiya loyihalarini boshlab berishi rejalashtirilmoqda. Uchrashuvlar yakunida amaliy hamkorlikning ustuvor yoʻnalishlari boʻyicha ikki tomonlama bitimlarning salmoqli toʻplamini qabul qilish koʻzda tutilgan.