19-dekabr, 2022

Gazdan noqonuniy foydalanish natijasida davlat manfaatlariga yetkazilgan zarar miqdori 3,2 mlrd soʻmga yetgan

Uch kunda 6,5 mingga yaqin xonadonning qish mavsumida bir oylik isteʼmoliga teng miqdordagi tabiiy gazdan noqonuniy foydalanish holatlari aniqlandi. Bu haqda Energetika vazirligi xabar berdi. Maʼlum qilinishicha, 15-18 dekabr kunlari Ishchi guruhlar tomonidan oʻtkazilgan nazorat tadbirlari davomida 250 ta holatda isteʼmolchilarning tabiiy gazdan noqonuniy va nooqilona foydalanish holatlariga chek qoʻyildi. Mazkur noqonuniy faoliyatlar natijasida davlat manfaatlariga yetkazilgan zarar miqdori 3,2 mlrd soʻmni va gaz hajmi 3,9 mln kub metrni tashkil etgan. Ushbu miqdordagi tabiiy gaz oʻrtacha 6,5 mingga yaqin hovli uylardagi xonadonlarning qish mavsumidagi bir oylik isteʼmolini tashkil qiladi. Tabiiy gazdan noqonuniy foydalanish holatlari respublikaning barcha hududlarida aniqlangan. Xususan:

Samarqand viloyati, Paxtachi tumanida fuqaro H.Hga qarashli tosh quritish sexida 260 mln soʻmlik;
Toshkent viloyati, Toshkent tumanida fuqaro M.Mga qarashli issiqxona xoʻjaligi 110,4 mln soʻmlik;
Toshkent shahri, Bektemir tumanida «Bobur Bunyod Trans» MChJga qarashli asfalt ishlab chiqarish korxonasida 82,9 mln soʻmlik tabiiy gaz noqonuniy ravishda foydalanilgan.

Aniqlangan holatlar yuzasidan rasmiylashtirilgan hujjatlar huquqni muhofaza qiluchi organlarga yuborildi.