18-dekabr, 2022

"Markaziy Osiyo+ formati mintaqaviy muvozanatni mustahkamlash va saqlashga xizmat qiladi" — Vladimir Norov

Oʻzbekiston Respublikasi Tashqi ishlar vaziri Vladimir Norov "Yangi Oʻzbekiston - oʻzgaruvchan va oʻzaro bogʻliq dunyoda ishonchli hamkor" mavzusidagi davra suhbati davomida "Markaziy Osiyo+" formatidagi muloqotni rivojlantirish masasalariga eʼtibor qaratdi. Qayd etilganidek, bugungi kunda "Markaziy Osiyo+" shaklidagi uchrashuvlar Rossiya, Xitoy, AQSh, Germaniya, Italiya, Hindiston, Koreya Respublikasi, Yaponiya, Koʻrfazi Arab hamkorlik Kengashi va Evropa Ittifoqi bilan oʻtkazib kelinmoqda. Ushbu mexanizm mintaqa mamlakatlarining asosiy tashqi siyosiy sheriklar va tashkilotlar bilan hamkorligining holati va istiqbollarini muhokama qilish imkonini beradi. Xususan, Oʻzbekiston Tashqi ishlar vaziri yaqinda Samarqandda boʻlib oʻtgan "Yevropa Ittifoqi – Markaziy Osiyo oʻzaro bogʻliqligi: "Global darvoza" birinchi xalqaro konferensiyasini eslatib oʻtdi. Mazkur anjuman doirasida barqaror oʻzaro bogʻliqlikni rivojlantirish, "yashil" rivojlanishni qoʻllab-quvvatlash va pandemiya oqibatlaridan xalos boʻlish boʻyicha muvofiqlashtirilgan chora-tadbirlarni ishlab chiqishning dolzarb masalalari muhokama qilindi.