17-dekabr, 2022

Janubiy Koreya Oʻzbekiston raqamli iqtisodiyoti uchun 330 ming dollar ajratadi

Janubiy Koreya Oʻzbekiston raqamli iqtisodiyoti uchun 330 ming dollar ajratadi. Bu haqda Axborot texnologiyalari va kommunikatsiyalarini rivojlantirish vazirligi xabar berdi. Axborot texnologiyalari va kommunikatsiyalarini rivojlantirish vazirining oʻrinbosari Jamshid Egamberdiyev boshchiligidagi delegatsiya aʼzolari Janubiy Koreya Respublikasida xizmat safarida boʻldi. AKT vazirligidan iborat delegatsiya aʼzolari Koreya Davlat boshqaruvi va xavfsizlik vazirligiga tashrif buyurib, ushbu vazirlik rahbariyati bilan rasmiy uchrashuv oʻtkazdi. Tashrif davomida Koreya Davlat boshqaruvi va xavfsizlik vaziri oʻrinbosari Xan Chang Sob bilan uchrashuv boʻlib oʻtdi. Uchrashuv natijasiga koʻra, «Elektron hukumat va raqamli iqtisodiyot sohasida hamkorlik qilish boʻyicha Oʻzbekiston—Koreya ekspertlar guruhi faoliyatini tashkil etish» loyihasini davom ettirish boʻyicha anglashuv memorandumini imzolandi. Loyiha doirasida 2020—2022 yillar uchun 1 mln dollar mablagʻ ajratilgan edi. Ushbu loyihani davom ettirish maqsadida Koreya tomoni bilan 2023 yilda Oʻzbekistonda raqamli iqtisodiyot va elektron hukumatni rivojlantirish maqsadida loyiha qiymati 330 ming dollar miqdorida mablagʻ ajratish boʻyicha kelishuvga erishildi.