12-dekabr, 2022

Toshkentdagi “Ilhom” teatrida yongʻin sodir boʻldi

12 dekabr kuni ertalab soat 03:34 da Toshkent shahar Shayxontohur tumanidagi “Ilhom” teatrida yongʻin chiqdi. Favqulodda vaziyatlar vazirligining maʼlum qilishicha, bu toʻgʻrisida shahar FVBga xabar kelib tushgan. Yongʻinni oʻchirishga 4 ta yongʻin-qutqaruv ekipaji jalb etilgan. Aniqlanishicha, yongʻin natijasida teatr binosining 1-qavat xollining 80 kv.m maydonda ichki qismi va jihozlari yonib zararlangan. Tezkor harakatlar sababli yongʻindan binoning 600 kv.m. maydoni saqlab qolingan. Hodisa oqibatida hech kim tan jarohati olmagan yoki halok boʻlmagan. Hozirda yonin sababi va moddiy zarar miqdori aniqlanmoqda. Yongʻin tufayli spektakllar minimum ikki haftaga qadar toʻxtatildi. Oldin sotib olingan barcha chiptalar teatr qayta ochilganda amal qiladi.