07-dekabr, 2022

Fargʻona vodiysi viloyatlarida AGTKSlar faoliyati vaqtincha toʻxtatildi

Andijon, Fargʻona va Namangan viloyatlaridagi avtomobillarga gaz toʻldirish stansiyalari vaqtincha yopildi. “Oʻztransgaz” xabariga koʻra, tabiiy gazni birinchi navbatda aholi uylariga va ijtimoiy obʼektlarga yoʻnaltirish maqsadida shunday qarorga kelingan.

“Ob-havo sovib ketishi tufayli aholi, ijtimoiy soha obʼektlarining tabiiy gazga boʻlgan ehtiyoji ortgani bois ularga tabiiy gaz yetkazib berish dolzarb hisoblanadi. Shuni inobatga olib, Fargʻona vodiysi viloyatlaridagi avtomobillarga gaz toʻldirish kompressor stansiyalari bugun, 7 dekabr kuni soat 11:00 dan vaqtincha ish faoliyatini toʻxtatdi.

Vaziyat izga tushgach odatiy ish faoliyatiga qaytilishini maʼlum qilamiz. Keltirilgan vaqtincha noqulayliklar uchun isteʼmolchilardan uzr soʻraymiz”, – deyiladi rasmiy xabarda.

Avvalroq, 4 dekabrdan boshlab Toshkent shahridagi AGTKSlar ham vaqtincha yopilgan edi.