Oʻzbekiston shaxmatchilari jahon chempionatida ikkinchi oʻrinni egalladi
Quddus shahrida shaxmat boʻyicha milliy jamoalar oʻrtasida FIDE jahon chempionati yakunlandi.
Oʻzbekiston shaxmatchilari finalda Xitoy bilan bellashib, 2 ta raund (1,5:2,5 va 1,5:2,5) yakuniga koʻra magʻlub boʻlishdi. Jahon chempionatining kumush medali oʻzbek shaxmati tarixidagi eng yaxshi natija boʻldi. Jahon chempionatida Oʻzbekiston milliy jamoasi sharafini GM Nodirbek Yoqubboyev, GM Javohir Sindarov, GM Jahongir Vohidov, GM Shamsiddin Vohidov, IM Abdimalik Abdisalimov va IM Ortiq Nigmatov himoya qildi. Shaxmatchilarimizga niderlandiyalik Ivan Sokolov sardorlik va murabbiylik qildi. Avvalroq, Oʻzbekiston milliy jamoasi jahon chempionatining guruh bosqichida AQSh (2,5-1.5), Isroil (2,5-1,5) va Hindistonni (3,5-0,5) magʻlub etib, Polsha (2:2) bilan durangga erishib, Ozarboyjonga (1,5-2,5) yutqazgan edi. Bu natijalar shaxmatchilarimizga guruhda birinchi oʻrin bilan chorakfinalga chiqish uchun yetarli boʻldi. Soʻngra, Oʻzbekiston shaxmatchilari chorakfinalda Ukrainani 2 ta raundda (3:1 va 2,5:1,5), yarimfinalda esa Hindistonni 2 ta (2:2 va 2,5:1,5) raundda magʻlub etishgandi.