26-noyabr, 2022

Hududlarda Prezident administratsiyasi rahbarining yordamchilari ish boshlaydi

Hududlardagi Xalq qabulxonalari faoliyatini muvofiqlashtirib borish uchun Prezident administratsiyasi rahbarining yordamchilari lavozimlari tashkil etilmoqda. Administratsiya rahbarining yordamchilari oʻz faoliyatini bevosita hududlarda amalga oshiradi. Bu lavozimlar mavjud shtat birliklarini qisqartirish evaziga tashkil etiladi. Bu borada prezident farmoni qabul qilingan. Hujjatda mazkur oʻzgarish “hududlar bilan toʻgʻridan toʻgʻri aloqalarni oʻrnatish va joylardagi vaziyatdan kelib chiqib, tezkor choralar koʻrib borish maqsadi” bilan izohlangan. Rasmiy xabarga koʻra, soʻnggi paytlarda Xalq qabulxonalari faoliyati yetarli samara bermayapti, joylardagi muammolarni hal qilishda sustkashlikka yoʻl qoʻyib, asosan sansalorlik bilan shugʻullanyapti, bu esa aholining haqli eʼtirozlarini keltirib chiqaryapti. Shu sababli Xalq qabulxonalari institutini kuchaytirish yuzasidan ayrim vazifalar belgilangan. Xususan, hududlarda administratsiya yordamchilari faoliyat boshlashidan tashqari, Xalq qabulxonalari xodimlariga taʼsirchan chora sifatida davlat organlari va tashkilotlarda jismoniy va yuridik shaxslarning murojaatlari toʻgʻrisidagi qonunchilik hujjatlari boʻyicha qonunbuzilishlar yuzasidan maʼmuriy bayonnomalar tuzish va sudga yuborish huquqi berilmoqda.