22-noyabr, 2022

Fransiya kompaniyasi Toshkent va Navoiy viloyatlarida muqobil energiya manbalarini rivojlantiradi

Fransiyaga tashrifi doirasida Oʻzbekiston bosh vaziri oʻrinbosari - investitsiyalar vaziri Jamshid Xoʻjayev Fransiya savdo vazirligi rahbariyati va bir qator yirik fransuz kompaniyalari bilan savdo- iqtisodiy va investitsiyaviy hamkorlik holati va uni yanada rivojlantirish boʻyicha chora-tadbirlarni muhokama qilishga bagʻishlangan qator uchrashuvlar oʻtkazdi. EDF kompaniyasi rahbariyati bilan uchrashuvda kompaniyaning Sirdaryo va Surxondaryo viloyatlaridagi joriy loyihalarini amalga oshirish jarayoni muhokama qilindi. Kompaniya vakillari Toshkent va Navoiy viloyatlarida muqobil energiya manbalarini rivojlantirish sohasida jami quvvati 1250 Mvt boʻlgan yangi loyihalarni amalga oshirishga qiziqish bildirishdi. Uchrashuv yakunida tomonlar qoʻshma loyihalarni amalga oshirish masalalarini ishlab chiqish boʻyicha kelishuvga erishdi. «SUEZ» direktorlar kengashi raisi Sabrina Sussan bilan uchrashuvda Toshkent shahri va Surxondaryo viloyati suv taʼminoti tizimlarini modernizatsiya qilish boʻyicha investitsiya loyihalarini amalga oshirish tashkiliy jihatlariga toʻxtalib, bunda kompaniya tajribasini Oʻzbekiston boshqa hududlarida suv taʼminoti tizimlarini rivojlantirishga kengaytirish istiqbollari koʻrib chiqildi. Kompaniya shaharlarda issiqlik tarmoqlarini modernizatsiya qilish va qattiq chiqindilarni boshqarish loyihalarida ishtirok etishini nazarda tutgan holda hamkorlikni kengaytirish boʻyicha ishlarni davom ettirishga kelishib olindi. EIFFAGE kompaniyasi rahbariyati bilan boʻlib oʻtgan uchrashuvda Yakkabogʻ – Qarshi yoʻnalishi boʻyicha magistral suv quvurini oʻtkazish loyihasi muhokama qilindi. Quvur uzunligi 82 km, suvni saqlash uchun 4 ta suv havzasi mavjud. Tomonlar loyihani jadal amalga oshirish choralarini koʻrishga kelishib oldi.